睇樓記

難得放假，一支公走咗去睇樓！原本都唔會的起心肝睇，但係amanda出聲話想換間大啲嘅屋，所以我就出師有名去睇樓！

先去唐人新村睇一個新盤，四千蚊呎，最細單位1300呎，超低密度，500萬起跳！基本上係畀有少少錢的人住，環境唔錯，但缺點有三：1.太貴、2.屋望屋，我唔明幾百萬買間屋點解仲要樓望樓，雖然距離遠，但因為落地玻璃窗，對岸四戶人都可以睇得好清楚我在廳中一舉一動，呢一層我都係唔太接受得到…3.廁所冇窗！大部份人都覺得冇所謂，但我覺得呢個係衛生問題，冇得傾！

然後我再在屏山至唐人新村一帶睇樓，主要睇翠疊軒同芙蓉園…其實有兩個我都好鍾意，一個245萬800呎外加小花園及車位；另一個400萬4房另加工人房加車位。但前者半年前二千蚊呎，而家要三千蚊呎…我實在不能接受！後者入伙兩年但很近輕鐵站，總會有些噪音，而且間屋兩套廁加廳客廁，只得主人房的廁所有窗，而且係落地玻璃窗，真係難接受咗少少…

屏山及唐人新村一帶生活機能接近零…買餸讀書都要坐車入元朗，而且附近沒有基建發展，升值能力不高，加上位置偏僻，真係一年都未必放得出一個盤…我又何必要在火盆中取貨入市？慢慢等到佢肯屈就放盤至算啦！

回到元朗公園路一帶睇，因為我主打三、四房單位，所以選擇不算太多，而且太貴！一個我睇得啱的千呎要370萬，三房另加有窗工人房及車位…但是單位向北…為何花咁多錢要買一個向北樓？

我有的是時間，冇的是金錢！以時間換取金錢，大屋我等得！