金像奬

人人話金像奬好悶，我冇睇晒，只係睇咗最後部份，即係十點幾至睇…ok啦！一個正式的頒奬禮係咁上下，只要將佢視為電影頒奬禮，唔係娛樂圈盛事，角度不一樣，我相信大家不介意悶！

我都覺得三位主持表現一般，可以話係冇咩默契。不過我都認同陳嘉上的講法，如果年年都畀好似曾志偉呢啲大大粒主持去做，年青一輩就永遠冇出頭。電影業最恐怖的咀咒，就係青黃不接。冇人再願意入行，唔係話冇人想做導演同演員，而係冇人願意做武指、攝影、收音、劇務、燈光…基層工種，全部都係上一輩的人長做長有！

香港電影點解會死？人人有唔同解讀！我會覺得死因一如樂壇，冇人正視呢樣藝術，只有娛樂圈，沒有電影圈！觀眾將一切簡化理解為娛樂。觀賞電影是娛樂，的確冇錯。但連演員私生活是娛樂、台前幕後的點點磨擦都是娛樂、頒奬禮是娛樂中的娛樂…到最後，沒有人會尊重電影，因為電影變得功能性，只是尋開心的一種工具！

所以出翻版，大家會簡單理解為尋找娛樂，可以省咁多錢，當然睇翻版！看似天經地義，不過轉個角度諗諗，林海峰笑話show，出現爭飛熱朝，場show晚晚做，場館外、旺角、深水埗…絕對找不到偷錄版…因為大家尊重這是林海峰辛苦成果，亦相信只能在場館內至有最佳效果，所以翻版市場不會有同步偷錄版出售。

林海峰笑話show投資了多少錢？花了多少人的心血？答案是一定比電影少！看電影，一定要在戲院看才有最佳效果。電影，工作人員心態可能只是為兩餐，但不過都是為所流的汗與精力取回回報。不要看得電影人有多神聖，只是希望大家相信一分耕耘一分收獲。拍過嘢的，一定很清楚，拍攝…真的很累人，一定比大家想像到的…更辛苦好多好多倍！

有人話香港電影差，不值得入戲院看，所以至買翻版！我跟大家一樣，覺得不好的，絕不入戲院看，用票房反映觀眾喜好！但既然不值得看，為何要買翻版，為何要bt？不看一套爛片，不會死吧！

說回金像奬。香港金像奬是華人世界裡，公信力最高的頒奬禮，但係亦是最冇錢搞的一個頒奬禮。有人提議不如賣門票，多一個收入來源，不是更好？

天啊…千萬不要！一堆梁洛c的fans叫喊助威，已經破壞力驚人！不要將金像奬，變成另一個沒有公信力的娛樂圈頒奬禮。

話說回青黃不接！誰有興趣去娛樂圈做打燈？不過是電影圈，地位自然又不一樣。大學每年都有人才出，不過誰願意去做燈光佬…沒有人敬業樂業，惡性循環不息！

請大家記得：電影是電影，不是娛樂圈！