性教育

今日睇報紙，有團體舉辦一個以平安夜，失身夜為主題的講座，居然有團體表示不應教青年人安全使用安全套，因為怕年青人誤以為大人默許自己性交，甚至濫交…他們認為性教育應該著重個人修養。

團體家庭為本負責人朱志江認為，現時性教育偏重教導年輕人如何避孕，間接鼓吹濫交，令他們習慣擁有多個性伴侶，婚後持續濫交，造成婚外情、家庭糾紛等社會問題。另一團體愛與生命工作室創會總監李鳳珊也認同，安全套的唯一用途是在性行為時避免懷孕和染上性病，教導青少年使用安全套，只會令他們誤以為成人默許他們發生性行為，「青少年大腦發展著重情感，缺乏理性思考能力，他們會認為若自己忍不住，便可以隨便與異性發生性行為」。她認為青少年未有做人生決定的能力，是以性教育應著重個人修養，而非安全性行為。

天呀…居然仲有人會咁諗！為人父母教仔女戴安全套，那是天經地義的，不要以為後生仔十二、三歲乜都唔識，十二歲就生仔的大有人在。我記得我未讀中學，已經知道何謂性了，已經會半夜三更入廁所偷偷睇x夫人信箱了！哪會有一個小四以上的男仔，不對性有衝動，不對性有好奇？當時阿媽乜都唔識乜都唔理，冇人教性為何物，頂窿小五小六健教科輕輕教吓男女結構。

那時候性教育係點？例子一，電影記得香蕉成熟時，是我最最最喜歡的電影！鄧一君第一次夢遺，第一次打飛機，開始對女仔有興趣…都說出了我的感受！有一幕曾志偉演的阿爸要教仔用安全套，拿出安全套，支支吾吾，一句大家明啦…咁就算數！點樣用？咩時候用，一句都冇提過！(以上情節係我的記憶，錯誤率都幾高！)

性教育例子二：記得中三那年，在爛仔多過四眼仔的班中度過，一次上地理堂唔知點解會講到性，有一個男同學仔大大聲話：男仔就有前有後，女仔就乜都喺後頭，搞嘢都要對住佢個背脊搞…阿sir笑到扒喺地，女仔就尷尬死！阿sir笑住話證明大家唔多睇書，咸書唔敢睇之餘請多看字典，翻開後邊彩頁有男女人體圖，大家睇清楚女生結構云云…我到那時候才知道原來那些平時也文也武的人，原來仲未失身！

那些衞道之士到底對社會有幾認識？你叫連字典都懶得翻的學生哥有個人修養？

在我成長的80年代尾，90年代初，性依然未及現時開放，都已經有朋友約女朋友返家溫馨了。何況是今天報紙已經不會再有x夫人信箱，而是咸相咸專欄，觸手所及全是召妓廣告，旺區找一間性用品店絕對不難。在現今連父母都把持不住可以性愛分家的年代，年青人個人修養再好，但亦難敵一時的衝動！

戴安全套，亦非幾多歲就開始性交的問題，亦非習慣濫交的問題，而是安全的問題。時代風氣是難以逆轉的，但一班衞道之士就依然視人命如草，真的是咸豐年代思想。抑或是他們的仔女真的不會有性衝動？安全套不在細細個的時候教點用，難道真的在18歲生日至教？到時可能係阿仔教返父母轉頭了！

生咗個仔出嚟，係咪你養先？

生咗愛滋，係咪你醫佢先？衞道之士，瞓醒嘞！